Ciclista Pablo Elgatomarinero (elgatomarinero7) wrote,
Ciclista Pablo Elgatomarinero
elgatomarinero7

Вераснёвая Віцебшчына - ч.3. Глыбокае

Папярэднія часткі:
Вераснёвая Віцебшчына - ч.1. Смаляны
Вераснёвая Віцебшчына - ч.2. Лепель

Наступным днём абяцалі пагодны міні-апакаліпсіс у выглядзе буры і моцнага дажджа, з штармавым папярэджаннем і нейкім там каляровым узроўнем небяспекі. Таму я першапачаткова вырашыў не губляць гэты дзень сідзеннем у Полацку, але і не ехаць у якую-небудзь вельмі цікавую кропку, дзе мне б потым прыйшлося шкадаваць, што я многа чаго цікавага не пабачыў. Менавіта таму на другі дзень вандроўкі (быў гэта панядзелак, дарэчы) я запісаў Расоны - маленькі райцэнтрык на поўнач ад Полацка, да якога ехаць нядоўга, а ўсё цікавосткі там у выпадку чаго прабягаюцца за гадзіну-паўтары. Але, як вы бачыце з загалоўка, на самой справе нешта пайшло не так :)

Карацей, прыйшоў я ў 9 гадзін раніцы на полацкі аўтавакзал - і даведаўся, што на ідучы праз Расоны аўтобус Наваполацк-Санкт-Пецярбург адпраўленнем з Полацка ў 9.30, якім я ў мінулым годзе катаўся ў Себеж, і які тады быў напалову пусты, квіткоў ужо няма ўвогуле. Вось так вось :) А я ж яшчэ думаў набыць квіток у нядзелю ўвечары, але надта хацеў хутчэй у хостэл патрапіць (так, хацець хацеў, але ўсё роўна на прыпынку доўга тады прастаяў - хто ж ведаў, што маршрутка зусім няхутка будзе)... Спрабаваць неяк дамовіцца з кіроўцам было б латэрэяй, ды і да таго ж у нас тут не Украіна: квіткі пры адпраўленні ўсё роўна звычайна вакзальная кантралёрка правярае. Дзень рызыкаваў быць згубленым, бо наступны аўтобус на Расоны адыходзіў ужо пасля 11 гадзін, і заставалася мне зусім нямнога часу да зваротнага аўтобуса. Выратавала мяне ўсё тая ж "Белчыгунка" - зайшоўшы на вакзал перакусіць, я пабачыў у раскладах руху прыгарадны цягнік Полацк-Паставы. У Паставах я калісьці досыць даўно быў ужо і ўсё там пабачыў, але ж яшчэ ён праязджаў і праз Глыбокае - а гэта ўжо куды больш цікава, у Глыбокае патрапіць я даўно хачу



01. Полацкі чыгуначны вакзал. Як я ўжо пісаў у мінулым годзе ў справаздачах пра сам Полацк, тут два вакзальныя будынкі - злева стары, тут ён крыху схаваўся за дрэвамі, з правага боку - больш новы. У левай пабудове зараз збольшага нейкая адміністратыўка, увесь жа пасажырскі сэрвіс (касы, зала чакання, кавярня) - у правым будынку


02. У кавярні буфетнага тыпу трошкі пазаўтракаў - і хутка быў на платформе. Тут ужо стаяў цягнік на Паставы


03. Да Глыбокага ехаць больш за дзве гадзіны, віды часам маляўнічыя (пару разоў чыгунка нават да берагоў нейкіх азёр выходзіла) - але без фота, бо карцінка ўсё роўна выглядала неяк так (гэта яшчэ ў Полацку фота зроблена)


04. Хіба што зачапіўся, як на нейкай станцыі (па-мойму, гэта было Загацце УПД. Больш якасны гуглінг такі паказаў, што гэта Фарынава) былы вакзальны будынак у царкву перабудоўваюць. Выглядае эклектычненька і трэшава, пагадзіцеся


Праз дзве гадзіны дарогі цягнік прыйшоў на вузлавую станцыю Крулеўшчызна. Звычайна адсюль цягнікі з Полацка ідуць проста на Маладзечна, але раз на дзень ураніцы ходзіць гэты самы прыгарадны цягнічок Полацк-Паставы, які ў Крулеўшчызне паварочвае на паўночны захад. Пра гэтую галіну чыгункі я ўжо трошкі пісаў у мінулым годзе падчас распавядання пра вандроўку на Браслаўшчыну. Калі карацей, то з Крулеўшчызны цягнікі ідуць на Варапаева, а Варапаева - гэта яшчэ адна вузлавая станцыя, дзе чыгунка з Крулеўшчызны падзяляецца на дзве галінкі: першая ідзе праз Паставы ў Лынтупы (а калісьці яна пасля Лынтупаў ішла далей, на Вільню), другая з Варапаева ідзе на поўнач - праз Шаркаўшчыну і Мёры на Друю (калісьці чыгунка і тут далей доўжылася - але ў выглядзе вузкакалейкі, што ад Друі ішла праз Браслаў кудысьці ў Літву). Абедзве чыгункі загружаныя дрэнна: на Друю ўвогуле толькі адзін раз на дзень ходзіць цягнік з двух-трох вагонаў з Віцебска і Мінска (яго збіраюць у Крулеўшчызне ўначы з дзвюх сустрэчных цягнікоў Мінск-Віцебск і Віцебск-Мінск). Што наконт галінкі з Крулеўшчызны на Лынтупы, то там гэтак жа сама ўначы ходзіць такой жа самы цягнік з бесперасадачнымі вагонамі цягніка Віцебск-Мінск, але днём яшчэ дадаецца адзін прыгарадны цягнік Крулеўшчызна-Лынтупы, плюс гэтак жа днём тут ёсць па аднаму цягніку Маладзечна-Глыбокае і Полацк-Паставы (у другім выпадку па пятніцах і нядзелях ходзіць яшчэ адзін цягнік увечары). А калі казаць пра пасажырскую запружанасць, то цягнік Полацк-Паставы пры мне з Полацка адыходзіў напалову запоўнены (але нагадаю, што гэта быў будны дзень), а пасля колькіх там "падполацкіх" прыпынкаў увогуле быў амаль пусты

05. Вакзал у Глыбокім. Дождж ужо ішоў, як бачыце


06. Будыначак акуратны, але ўсярэдзіне так "прыемна" несла з прыбіральні, што і не дзіва, што нешматлікія чакаючыя нават нягледзячы на надвор'е чакалі свае цягнікі знадворку


07. А вось і мясцовы расклад руху


08. Вакзальная плошча. Здавалася б, павінна быць "варотамі" горада, але тут хутчэй бачна, што з чыгункай у горадзе не вельмі


Глыбокае - райцэнтр у заходняй частцы Віцебскай вобласці, у 200 кіламетрах ад абласнога цэнтра. Насельніцтва - каля 19,0 тысяч жыхароў. Упершыню згадваецца ў гістарычных крыніцах у 1514 годзе, але ёсць археалагічныя сведчанні пра тое, што паселішча тут было яшчэ ў часы Полацкага княства - у 11-13 стагоддзях. Назва горада паходзіць ад старой назвы аднаго з двух гарадскіх азёраў - Кагальнага, у даўніну яно звалася Глыбокім. Досыць, па мерках заходняй часткі Віцебшчыны, буйны прамысловы цэнтр - у Беларусі (і за мяжой, напэўна) ён вядомы перш за ўсё дзякуючы згушчонцы мясцовага малаказавода. "Якая згушчонка лепшая: Глыбоцкая ці Рагачоўская?" - гэта даўняя тэма для халівараў у байнэце і па-за інтэрнетам (я за глыбоцкую, калі што).

Адразу кажу, што горад мне спадабаўся - і ў архітэктурным плане (даўніны там хапае) і проста сам па сабе. На фоне дэпрэсіўнай правінцыі Віцебшчыны (абяцаю сам сабе больш у гэтай серыі артыкулаў гэты абарот больш не выкарыстоўваць, бо ён і мне самаму надакучыў ужо) Глыбокае як мінімум знешне выглядае досыць цывілізавана (але ж, я тое самае калісьці і пра Паставы, якія не так ужо і далёка адсюль, напісаў). Горад досыць добра (хоць і не без агратрэшу дзе-нідзе, але ж куды без гэтага) "дажынкізаваны" - відавочна, да Дня беларускага пісьменства, які святкавалі тут у 2012 годзе.

Пайду па цікавостках, пакуль надвор'е канчаткова не звар'яцела. Дарэчы, паколькі дождж у той дзень не прыпыняўся, а хіба што станавіўся то слабейшы, то мацнейшы, я вырашыў берагчы фоцік і Глыбокае фатаграфаваў толькі на кітаефон - яго не так шкада, ды і нейкі ён больш устойлівы супраць вільгаці

09. Былы бровар сядзібы Вітгенштэйнаў. Вітгенштэйны некаторы час былі валадарамі тагачаснага мястэчка


10. Маскоўская - адна з галоўных вуліц горада. Цікава, што (як і Маскоўская вуліца ў Мінску) "глядзіць" яна на поўдзень і паўднёвы захад - зусім не ў бок Масквы


11. Старых будынкаў у Глыбокім хапае, хоць яны раскіданыя па цэнтры горада і цэлага паўнавартаснага ансамблю не складаюць


12. Нечакана салідны для такога невялікага райцэнтра будынак выканкама


13. Трошкі аграрэнесансавага кітчу на галоўнай плошчы горада


14. На заднім плане - тое самае Кагальнае возера, што ў старыню звалася Глыбокім


15.


16. Здалёк будынак паказаўся цікавым, але зблізу - эўрарэмонтны трэш. Дарэчы, пасля візіту ў Глыбокае Гугл дагэтуль дастае мяне, рэкламуючы гэты гатэль у кантэкстнай рэкламе


17. Трошкі трэшумілаты каля Дома рамёстваў


18. Ну, файны цмок жа, згадзіцеся :)


19.


20. Дзядзя-грыбочак кагосьці нагадвае ідзе да мяне на аватарку ў кампаніі з лепельскім цмокам :)


21. Іду далей


22. Набліжаюся да самага смачнага


23. На плошчы 17 верасня адзін насупраць другога стаяць два галоўныя гарадскія храмы: каталіцкі і праваслаўны. Ля каталіцкага касцёла можна пабачыць "Алею славутых землякоў", прысвечаную славутасцям, якія паходзяць адсюль. А ліст іх тут досыць багаты: і славуты мастак Язэп Драздовіч, і авіяканструктар Пётр Сухі, і "бацька беларускага тэатра" Ігнат Буйніцкі (на фотазагалоўку)


24. Дзяржаўны дзеяч ВКЛ Іосіф Корсак


25. Магутны Траецкі касцёл. Першапачаткова пабудаваны ў 1764-82 гг., але амаль цалкам перароблены ў пачатку 20 стагоддзя - ад першапачатковага будынка застаўся толькі фасад


26.


27.


28. Не такі ўжо і часты выпадак, калі ў мяне атрымоўваецца зазірнуць усярэдзіну храма


29. Хто там мінулым разам здзіўляўся ў каментарыях, што галоўнымі цікавосткамі мястэчак у мяне заўсёды аказваюцца касцёлы? Дык вось, галоўная архітэктурная цікавостка Глыбокага зараз належыць праваслаўнай царкве - але ж першапачаткова яна таксама была каталіцкім касцёлам, праваслаўныя яго ўжо пазней прыбралі. Гэта сабор Раства Багародзіцы, былы каталіцкі касцёл Прачыстай Багародзіцы, частка комплексу былога кляштара кармелітаў. Касцёл пабудаваны 1639-54 гг., пазней неаднаразова перабудоўваўся


30. Побач з царквой, дарэчы, гарадская міліцыя


31.


32. Храмавая тэрыторыя


33. Магутны


34.


35. І тут усярэдзіну патрапіў


36. Ладна, час цягніка на Полацк набліжаецца, ды й бура узмацнялася (я нават у дажджавіку добранька змок у той дзень, бо з такім ветрам кітайскі "эўрашопаўскі" дажджавік мала дапамогі даваў), таму пайду да вакзала


37.


38. Самалётцік


39. Кагальнае возера. Недзе за касцёлам ёсць і больш буйное возера - Вялікае, але я да яго не дайшоў


40. Пушкін


41. Напэўна, Колас, але чамусьці і Чаргінца нагадвае :)


42. Помнік "Дзед-глыбачанін". Прататыпам з'яўляецца мясцовы гісторых і краязнаўца Аляксандар Сабалеўскі


43. Які-небудзь з абодвух храмаў адкуль-небудзь часцяком бачны


44. Выстава карчоў, для Віці victogan :)


45.


46. Хутка, транзітам праз краму, быў на вакзале


47. А адтуль, замёрзнуўшы ў халодным вагоне цягніка - на Полацк


У Полацку як мага хутчэй паехаў у хостэл - грэцца і спаць. На шчасце, прагноз надвор'я на бліжэйшыя дні катаклізмаў ужо не абяцаў. І, забягаючы наперад, наступны дзень быў сонечны, хоць і не казаць што цёплы. А чакаў мяне наперадзе візіт у самы маленькі горад Беларусі, куды патрапіць я хацеў ужо даўно. То бок, працяг будзе...
Tags: 2018, Беларусь, Витебская область, Глубокое, Поозерье
Subscribe

Posts from This Journal “Витебская область” Tag

  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 22 comments