너구리 자전거 타는 사람 (elgatomarinero7) wrote,
너구리 자전거 타는 사람
elgatomarinero7

Багданаў-Валожын-Ракаў-Заслаўе

Пакуль за вокнамі восеньскія дажджы, яшчэ раз вярнуся у сонечнае і цёплае лета і распавяду вам пра яшчэ адзін свой летні маршрут. У суботу 29 чэрвеня я здзейсніў чарговую паездку "з чыгункі на чыгунку", але асаблівасць яе была ў тым, што чыгуначны вузел, напрамкі якога я звязаў гэтым разам, быў Маладзечанскі - то бок, той, на вузлавую станцыю якога маршрутаў прыгарадных цягнікоў з Баранавічаў няма. Як вынік, дарога на старт і ад фінішу трэка заняла прыкладна столькі ж часу, колькі сам трэк

IMG_0196.jpg



01. Дызелем Баранавічы-Ліда на 5.11 раніцы даехаў да Ліды. Там можна было нават не выходзіць з вагона (але ўсёльткі заскочыў у вакзальную кавярню), бо гэты жа баранавіцкі цягнік праз гадзіну пайшоў рэйсам Ліда-Маладзечна. У 10.24 прыехаў на станцыю Багданаў. Вакол станцыі знаходзіцца аднайменны аграгарадок, а ўвогуле побач ёсць вёска Багданава (ад якой яўна ўся гэтая паланізаваная чыгуначна-аграгарадковая тапаніміка і пайшла), але да яе бліжэй, здаецца, не "свая" станцыя, а п.п. Вайганы
IMG_0025.jpg

02. Інтэр'ер вакзала
IMG_0033.jpg

03. Тут хуценька сабраў ровар і рушыў на поўдзень. Па іншы бок чыгункі ад Багданава - вёска Дзесятнікі з пахаваннямі жаўнёраў I сусветнай вайны
IMG_0063.jpg

04. Тут пахаваныя нямецкія, аўстрыйскія і расійскія жаўнёры
IMG_0056.jpg

05.
IMG_0052.jpg

06. Увагі заслугоўвае мемарыяльны слуп з арлом наверсе
IMG_0069.jpg

07.
IMG_0071.jpg

08. За Дзесятнікамі рушыў на мясцовыя дарогі (хаця маршрут увогуле быў пераважна асфальтавы)...
IMG_0076.jpg

09. ...і хутка дабраўся да былой сядзібы Храптовічаў "Адравонж" (ці "Андрывонш") каля вёскі Коцеўшчына
IMG_0080.jpg

10. Каб дабрацца да ўваходу ў будынак, прыйшлося лезці праз дрэвы (на фотаздымках яшчэ нулявых гадоў будынак стаіць на адкрытай пляцоўцы і добра праглядваецца, хаця дэстрой там адчуваўся ўжо тады). У савецкія часы тут быў дзіцячы санаторый "Церамок"
IMG_0084.jpg

11. Усярэдзіну лезці нешта не хацелася
IMG_0082.jpg

12. Дарэчы, навокал сядзібы - даволі масштабны парк, але ён у прыкладна такім жа стане. Але сцежкі праз яго ёсць: я так разумею, дзякуючы рыбакам, якія катаюцца на паркавую сажалку, схаваную дзесьці за дрэвамі (да якой я не паехаў, бо і так камары каля сядзібы з'елі)
IMG_0088.jpg

13. Калі вы думаеце, што ўжо савецкія пабудовы санаторыя захаваліся лепш, то вы вельмі дужа памыляецеся
IMG_0089.jpg

14. Далей рушыў на захад, праехаўшы мастом праз каналізаваную рэчку Альшанку
IMG_0092.jpg

15. А за ракой - вёска (былое мястэчка) Вішнева, вядомае перад усім тым, што тут нарадзіўся будучы прам'ер-міністр і прэзідэнт Ізраіля Шымон Перэс. Нагадваю даўні (аўтарства не маё, канешне ж) жарт-назіранне пра тое, што ў Беларусі нарадзілася больш прэзідэнтаў Ізраіля, чым прэзідэнтаў Беларусі. Дзесьці ў вёсцы ёсць месца, дзе калісьці стаяў яго родны дом, але я яго шукаць пашкадаваў часу, абмежаваўшыся тут старадаўнім Благавешчанскім касцёлам (17 ст.)
IMG_0115.jpg

16.
IMG_0118.jpg

17. Брама-званіца
IMG_0122.jpg

18. І праваслаўная царква-"мураўёўка" св. Казьмы і Дам'яна
IMG_0126.jpg

19. Хутка пакаціў у бок Валожына. Мясцовыя абарыгены
IMG_0127.jpg

20. Царква Прарока Іллі на могілках у Сакаўшчыне. Сакаўшчына, дарэчы, была такая доўгая-доўгая, што мне ажно абрыдла праз яе каціць
IMG_0143.jpg

21. А за вёскай - вадасховішча на яшчэ невялікай тут Заходняй Бярэзіне
IMG_0144.jpg

22. Вятрак дзесьці пад Валожынам
IMG_0152.jpg

23. На вадасховішчы многа рыбакоў ці простых адпачываючых
IMG_0158.jpg

24. А яшчэ там быў у той дзень моцны вецер
IMG_0172.jpg

25. Калісьці я называў у сваім блогу Мазыр самым "горным" горадам Беларусі (таксама не майго аўтарства эпітэт, канешне ж), але Валожын, нягледзячы на сціплыя памеры (жыве тут каля 10 тысяч чалавек), зможа за гэты тытул з "Перлінай Палесся" паспрачацца - перапад вышыняў там сапраўды добры (і яўна большы, чым, напрыклад, у тым жа Наваградку), а гарадскія мікрараёны вельмі эфектна глядзяцца ад цэнтра на вышынях супрацьлеглых узгоркаў - нажаль толькі, чамусьці я фотаздымкаў гэтага не зрабіў, абмежаваўшыся ў Валожыне толькі архітэктурай
IMG_0173.jpg

26. Драўляная царква-"мураўёўка" св. Канстанціна і Алёны
IMG_0183.jpg

27. Будынак былой ешывы
IMG_0190.jpg

28.
IMG_0192.jpg

29. "Птушыны" мурал у цэнтры горада
IMG_0196.jpg

30. Забудова савецкая...
IMG_0199.jpg

31. ...але ёсць будынкі і больш старыя
IMG_0201.jpg

32. Плошча Свабоды - цэнтральная плошча Валожына
IMG_0208.jpg

33. Перакусіў (30 кіламетраў - усё як заўсёды) каля будынка выканкама
IMG_0214.jpg

34. Горад, відавочна, рыхтавалі да якіх-небудзь чарговых "Дажынак", таму цэнтр быў дзе-нідзе перакапаны - як тут, перад касцёлам св. Іёсіфа
IMG_0216.jpg

35. На поўдзень ад плошчы Свабоды знаходзіцца самае цікавае, што ёсць у Валожыне - былы палацавы комплекс Тышкевічаў. Зараз большая яго частка занятая вайсковай часткай: ад варот будынкі бачна, але проста так усярэдзіну, відавочна, не патрапіць, дый фатаграфаваць я не рызыкнуў, бо ў той момант надта многа вайскоўцаў ля варот тусавалася. Таму абмежаваўся будынкам былой аранжэрэі, які да вайсковай часткі не адносіцца - там зараз сядзіць ваенкамат і рэдакцыя мясцовай газеты
IMG_0217.jpg

36. Будынак аўтавакзала. Чыгункі ў Валожыне, дарэчы, няма, хаця станцыя "Валожын" паміж Лідай і Маладзечнам ёсць - але яна знаходзіцца даволі далёка ад горада
IMG_0221.jpg

37. На могілках выездзе ў бок трасы М6 - Спаса-Ператварэнская капліца 19 стагоддзя, да непазнавальнасці перабудаваная ўжо ў нашыя часы
IMG_0230.jpg

38. Трошкі асфальту на поўдзень, да Бабровічаў, паварот на ўсход - і сюрпрыз у выглядзе колькі-но кіламетраў брукаванкі
IMG_0231.jpg

39. Брукаванка на захадзе Беларусі - не такая ўжо і рэдкасць, але звычайна яны мне трапляюцца ў глухаватых вёсках у бок ад галоўных дарог; тут жа брук - гэта менавіта што некалькі кіламетраў дарогі паміж населенымі пунктамі ад Бабровічаў ажно да Ляшчаткі. Выглядае прыгожа і цікава, але каціць такой дарогай, канешне ж, цяжка і не вельмі прыемна
IMG_0235.jpg

40. Але ад Ляшчаткі зноў пайшоў асфальт, якім я прыехаў у Першаі
IMG_0238.jpg

41. Тут патрабуе ўвагі каталіцкі касцёл св.Юр'я
IMG_0244.jpg

42. За гэтай вёскай была, напэўна, самая лепшая і лёгкая частка трэка. Добры асфальт і адсутнасць аўтамабільнага руху дазволілі хуценька ляцець узгоркамі, разглядваючы шырокія навакольныя прасторы
IMG_0254.jpg

43. Будынак аграсядзібы ў Малой Люцінцы - роднай вёсцы беларускага пісьменніка Вінцэнта Дуніна-Марцінкевіча
IMG_0262.jpg

44. А на ўсход ад вёскі Люціна - рэшткі сядзібы Зэляў
IMG_0265.jpg

45. У сажалцы паміж дарогай і сядзібай плаваў нейкі вадалаз, але што ён там шукаў - пытаць не стаў, бо ён і так яўна быў не рады, што тут нейкі цудзік стаіць з фотаапаратам і фатаграфуе яго
IMG_0272.jpg

46. Капліца-пахавальня Жаброўскіх каля вёскі Падневічы
IMG_0280.jpg

47.
IMG_0274.jpg

48. А каля капліцы - каталіцкія могілкі, дзе знаходзіцца магіла Дуніна-Марцінкевіча. Наколькі я разумею, гэтыя могілкі - такі сабе міні-"Лічакаў" для каталіцкай шляхты з навакольных вёсак
IMG_0281.jpg

49. Драўляная Траецкая царква ў Кіяўцы
IMG_0294.jpg

50. Ад Кіяўца ўжо прамая дарога на Мінск, і блізкасць да сталіцы тут ужо адчуваецца - вёска людная і жывая (я нават на вясковай вуліцы сустрэў машыну эўраоптаўскай "е-дастаўкі"), таму рух асфальтавымі дарогамі у раёне Кіяўца (ці, калі быць больш дакладным, ужо ад Падневічаў) вялікі. Прабірацца далей на ўсход я вырашыў мясцовымі дарогамі - і рушыў на поўдзень ад вёскі, да мосціка праз прабягаючую побач Іслач. Мосцік, дарэчы, экстрэмальненькі - поручань тут (як мо бачна на фота, хаця і не вельмі) адваліўся набок, таму пераносіць ровар прыйшлося балансуючы на дошках, якія яшчэ дзесьці пасярэдзіне нахіліліся направа
IMG_0307.jpg

51. Іслач тут мае дзікаваты і трохі "джунглевы" выгляд
IMG_0309.jpg

52. А трошкі вышэй знайшлася маляўнічая стаянка (дарэчы, стаянак у акрузе на мапе вельмі многа, і ўвогуле Іслач у беларускіх турыстаў-воднікаў рэчка досыць папулярная), дзе я зноў жа трошкі адпачыў і перакусіў
IMG_0313.jpg

53. Праз лес...
IMG_0318.jpg

54. ...вясковым брукам...
IMG_0319.jpg

55. ...і ўзгоркамі...
IMG_0324.jpg

56. ...даехаў да Ракава
IMG_0336.jpg

57. Мост праз Іслач
IMG_0345.jpg

58. Сажалка ў цэнтры мястэчка
IMG_0352.jpg

59. І касцёл Багамаці Ружанцовай
IMG_0362.jpg

60. Адчынены, можна патрапіць усярэдзіну
IMG_0367.jpg

61. Нават палякі сюды дабраліся
IMG_0377.jpg

Ракаў, канешне, мястэчка вядомае, але прызнаюся, што я чамусьці чакаў ад яго трошкі большага - мне неяк думалася, што тут будзе які-небудзь гістарычны цэнтр, але на самой справе гэта проста вялікая і вельмі цывільная вёска (дзе зноў жа, трэба адзначыць, ужо адчувалася блізкасць да сталіцы краіны - машын многа, людзей многа, дамы пераважна багатага выгляду, у цэнтры мястэчка - крама адной з агульнабеларускіх гандлёвых сетак). Пракаціўся, але ж, нешматлікімі цікавосткамі

62. Трошкі кітчавы, але каларытны будынак музею-галерэі "Янушкевічы"
IMG_0384.jpg

63.
IMG_0387.jpg

64.
IMG_0385.jpg

65. Спаса-Ператварэнская царква
IMG_0391.jpg

66. Каталіцкая капліца святой Ганны
IMG_0405.jpg

67. Могілкі побач з капліцай
IMG_0417.jpg

68.
IMG_0420.jpg

69.
IMG_0424.jpg

70. Склеп-пахавальня Друцкіх-Любецкіх
IMG_0429.jpg

71.
IMG_0409.jpg

72. За Ракавам працягнуў па магчымасці пазбягаць запружаных падмінскіх дарог, таму спачатку трошкі паблукаў у лесе...
IMG_0433.jpg

73. ...але хутка выехаў да трасы М-14 (так званай МКАД-2)
IMG_0435.jpg

74. На шчасце, тут былі адкрытыя форткі, таму я змог перабегчы трасу (тым болей, руху на ёй увогуле амаль не было), інакш прыйшлося б вяртацца ў Ракаў
IMG_0447.jpg

75. Дарогі размытыя пасля нядаўніх дажджоў
IMG_0448.jpg

76. Лесам раптам выехаў да нейкіх дэпрэсіўных панэлек, якія пры падрыхтоўцы маршруту неяк прапусціў
IMG_0452.jpg

77.
IMG_0457.jpg

78. Гэта ў нас пасёлак Аксакаўшчына. Сюды ўжо, як бачыце, нават ходзяць рэйсавыя аўтобусы ад канцавой станцыі Мінскага метрапалітэну
IMG_0456.jpg

79. Дзесьці за лесам знаходзіцца Рэспубліканская клініка лячэбнай рэабілітацыі, і ўезд да Аксакаўшчыны і клінікі аформлены вось так вось праваслаўненька
IMG_0463.jpg

80. Нейкія "сталкеры" даследуюць закінутую "панэльку" каля Ліхачоў
IMG_0467.jpg

81. А ў Новым Полі я патрапіў да сядзібнага дома Друцкіх-Любецкіх, які зараз знаходзіцца на тэрыторыі Навапольскага аграрна-эканамічнага каледжа (і нешматлікія студэнты, якія невядома што рабілі ў кампусе каледжа чэрвеньскім суботнім вечарам, са здзіўленнем паглядалі на гэтага вар'ята з роварам, які хадзіў тэрыторыяй і нешта тут фатаграфаваў)
IMG_0468.jpg

82.
IMG_0473.jpg

83.
IMG_0480.jpg

84. За Новым Полем праехаў яшчэ пару людных гэтым суботнім вечарам вёсачак - і далей была ўжо сапраўдная глухамань
IMG_0485.jpg

85. За глухаманню выехаў на "бетонку", а праз пару кіламетраў пабачыў збоку шырокую водную прастору
IMG_0489.jpg

86. Гэта ў нас вадасховішча Крылова, зробленае ў 1980я гады для водазабеспячэння Мінска ў выпадку надзвычайных становішчаў
IMG_0490.jpg

87. Вадаём стратэгічны, таму навокал - забор, праз які ніяк не пралезці
IMG_0493.jpg

88. Ужо добра вечарэла, але фініш недалёка. Спачатку бетонкай, а потым дрэнным асфальтам я усё больш набліжаўся да Заслаўя. У вёсках адчуваўся суботні вечар, бо ўсюды было многа дачнікаў. Вось і на тэрыторыі аграсядзібы каля вёскі Дзічкі колькі адпачываючых
IMG_0498.jpg

89. Я ж непарадна, праз старыя кар'еры, заязджаю ў Заслаўе
IMG_0501.jpg

90. Мясцовая гапата
IMG_0507.jpg

91. Яшчэ трошкі прыгараднай глухамані, а за ёй - ужо знаёмы горад, таксама досыць людны ў такі час
IMG_0511.jpg

92. Часу хапіла яшчэ і на заслаўскае замчышча скатацца
IMG_0515.jpg

93. Вечаровая панарама горада
IMG_0520.jpg

94. Спаса-Ператварэнская царква
IMG_0523.jpg

Ад Заслаўя паехаў электрычкай на Мінск, у Мінску прыкладна дзве гадзіны ў запоўненай зале чакання - і начной электрычкай на Баранавічы. У Баранавічах яшчэ мяне трошкі пратрымалі вакзальныя міліцыянты, абфатаграфаваўшыя мой ровар і мяне з нім: нейкая ў іх новая акцыя для барацьбы з роварнымі крадзяжамі - са стварэннем базы раварыстаў і іх транспартных сродкаў. Як на маю думку, ідэя зусім бессэнсоўная (вось паглядзеў б я, як яны б шукалі ў выніку чаго з гэтай базай мой Silverback Stride 10, які досыць масава прадаецца, здаецца, па ўсёй эўрапейскай частцы былога СССР года так з 2014га), але вось прыйшла яна, відавочна, камусьці з кіраўніцтва на думку - і прыходзіцца радавым міліцыянтам выконваць. Прычым, трапляў пад такую "акцыю" не я адзін - дакладна ведаю, што некаторых баранавіцкіх раварыстаў ужо потым гэтак жа сама на баранавіцкім вакзале абфатаграфавалі.

Дома ж я быў ужо пасля 3 гадзін ночы і потым праспаў ледзь не палову наступнага дня
Tags: Аксаковщина, Беларусь, Богданов, Вишнево, Воложин, Воложинский район, Десятники, Заславль, Ислочь, Киевец, Крылово, Минская область, Минский район, Новое Поле, Ольшанка, Першаи, Раков, Саковщина
Subscribe

Posts from This Journal “Минская область” Tag

promo elgatomarinero7 february 22, 2019 08:30 9
Buy for 10 tokens
Каталагізаваў усе свае артыкулы і справаздачы па вандровачках. Ціскайце на спойлеры і чытайце :) Мой рейтинг белорусских архитектурных достопримечательностей (в частях, по состоянию на 01.01.2021) Беларусь. Архитектура. Мой топ-50 (часть 1 - места 26-50) Беларусь. Архитектура. Мой топ-50…
  • Post a new comment

    Error

    Anonymous comments are disabled in this journal

    default userpic

    Your reply will be screened

    Your IP address will be recorded 

  • 9 comments